Hriamnam thazaang hmang in Myanmar ram uknak hramhram in a latu Min Aung Hlaing le a ralkap hna ruang ah Chinram in Mizoram lei a zaam mi Chin ralzaam ngakchia a tam deuh cu, nikhat ah suimilaam pakhat lawng sianginn ah ca an cawng tiaht ralzaam camp a ummi hna sin in thawng kan theih.
Hi kong he pehtlai in ralzaam camp ah a ummi CDM sayama Pi Thawng Tha Par nih, “District lei rian ngeitu hna nih sianginn ah ca cawn khawhnak nawl cu an kan pek ko. Asinain, kan sinak nih a tlinh lo ca ah sianginn ah kan chia kho hna lo. Hi bantuk dirhmun kan si ca ah, anmah sianginn tu hi nikhat ah suimilaam pakhat an kan hlanh. Hi suimilaam pakhat an kan hlanh mi chung ahhin kanmah nih Myanmar ram kan cawnmi ca te kan chimh hna. Ngakchia hi, an catang ning in then a si tik ah nikhat ah suimilaam pakhat hi cu kan i zaa deuh lo,” tiah CCN ah a chim.
Nikhat suimilaam pakhat sianginn an hlanh hna hi, anmah Cozah sianginn I a kaimi siangngakchia ca an cawn dih hnu zaanlei suimilaam 4:00 hnu ah a si, khi hnu i ngakchia sianginn vun kai than ter ding ah harnak an tong ngai tiah hmuh le theih a si.
Hi kong he pehtlai in, “Kan unau hna nih sianginn cu an kan kaiter ko an kan hlanh ko. Asinain, a caan hi a tlai pah tik ah kan fale ca ah a har ngai cang. Hi bantuk dirhmun kan phak tik ah, upa hna bia kan i ruah hna i kanmah le kan umnak camp cio zong ahhin chimh ding an si ve ko tiah biakhiahnak kan tuah. Biakhiahnak kan tuah bantuk tein CDM saya/ma hna nih pumpek in ca kan chimh tawn hna,” tiah CDM Sayama Pi Tin Sung nih CCN ah a chimchap.
Cun, ngakchia hna fimcawnnak kong he pehtlai in Lawngtlai District Primary School tuanvo ngei nih, “Ralzaam ngakchia hna hi kan ruah hna tik ah zaangfak tuk an si ko. Fim cawnnak lei ah biatak tein tanlak pi cu kan timh ko hna. Sianginn zong extra class in kan hlanh hna i, anmah ca te hi kan cawnter hna. Anmah ca kan cawnter hnanak a ruang zong hi, nan ram zeitik a that lai theih a si lo. A caan a rau rih ding phung a si. Caan saupi kanmah ca an cawn a si cun anmah holh, an ram holh an philh sual lai ti kan phanpiak hna ca ah anmah ca kan cawnter hna hi a si,” tiah CCN nih 2022 August 7 bia kan halnak ah a chim.
Myanmar ram buainak ruang ah le COVID-19 zawtnak ruang ah ngakchia sianginn kai kho loin an umnak hi kum thum leeng a si cang. Kum thum leng ca he an i hlat tik ah ca hi a hram in thok than a si tiah saya/ma hna sin in kan theih.
