The United States nih a rauh hlan ah Kawlram Ralkap Cozah cung ah dantatnak a tuah chap dingmi kong a phuan lai, tiah State Department lei in hruaitu nih a chim.
US State Department Counselor a simi Derek Chollet nih Jakarta thawnghaltu hna sinah, “Tutan dantatnak kan tuah dingmi nih Kawlram ralkap cozah cu hriamnam thar cawk awk ah a harhter chin lai,” tiah a chim.
United State le nitlaklei ram tampi nih Kawlram ralkap cozah le ralkap chungtel hna cung ah dantatnak phun tampi an rak tuah cang hna.
US nih Kawlram ralkap pumpak in minung 80 renglo cung ah dantatnak kan rak tuah cang, tiah Chollet nih a chim. Kawlram buainak a daih khawh nakhnga Russia nih ralkap bawmhnak a pekmi a ngol hrimhrim a herh, tiah Chollet nih a chim chap.
“Kawlram ralkap nih ramleng in hriamnam an luhpi khawh lo tik, Russia nih hriamnam bawmhnak a pek ti lo tikah, karhlannak nganpi kan tuah lai,” tiah a chim.
Association of Southeast Asian Nations (ASEAN) zong nih ramkhel tonnak ah Kawlram ralkap hna cu telh lo, sawm lo ding in a chimh hna. Ref: Reuters
