Chin ramkulh Tonzang khuapi cu May 23 zaan ah Chinland ralkap hna nih tlamtling tein an lak khawh cang tiah theih a si.
Tonzang khuapi palik sakhan le Kha-Lah-Yah 269 ralkap sakhan hna cu Chinland ralkap hna nih an lak i ralhrang hna nih khuapi ngah khawh nak ding ah helicopter le jet fighter hmang in an i zuam len ca ah kaphnih kahdohnak a fak ngai. Cu kahdohnak ah SAC ralhrang a nung in tlaihmi an um tiah CNA chimphuannak nawlngei Salai Htet Ni nih a chim.
“Tonzang khuapi cu May 23 zaanlei suimilam 4 hrawng ah SAC ralhrang hna kut in kan lak khawh cang. Ralhrang kan tlaihmi zong an um i a zam mi zong an um hna.A zammi hna cu Tedim khuapi lei ah an zam hna. Minung 40 hrawng kan tlaih hna i 15 hrawng cu hliam an tuar” tiah a chim.
“Cun kan tlaihmi hna hi ralkap an van chapmi hna an si lai tiah kan zumh” tiah a chim chap.
Tonzang khuapi laknak cu May 17 in an rak thok i May 23 zanlei tiang an i kap. Ralhrang lei in minung 20 hrawng an thi i Chinland ralkap lei in ram le miphun ca ah nunnak a pe mi an um ve tiah theih a si.
