Vaupi [ April ] 26, 2024_CCN Channel
Mindat peng, Teihne No.2 Vomthu sii-inn cu April 25, zaan sml 8:00 ah SAC ralkap nih raltuknak vanlawng in bomb a thlak caah sii a thlop lio mi minung 4 nunnak a liam i minung 15 leng nih hliamhma faak an tuar tiah kan theih.
“Bomb thlak ruang ah sii aa thlop lio mi minung 4 a hmun ah an nunnak a liam i, minung 15 leng nih hliamhma faak an tuar, hi nak zong in an tam kho,” tiah CDF -Mindat in ṭuanvo ngeitu Hua Om nih VOA ah a fehter.
Hi bomb thlak ruang ah hin sii-inn le zung riantuan hna umnak inn pawl zong a rawk tiah a chim chap.
Cun Vomthu sii-inn lawng si loin a pawng khua, khua 2 zong ah April 26 zinglei ah bomb a thlak than caah mipi hliamtuar le inn rawkral a um kho tiah CDF-Mindat nih an langhter. Hi ti vanlawng in bomb a thlak lio ah hin kaphnih kar kahdohnak zei hmanh a um lo tiah theih a si.
Vomthu khua cu Mindat khua chaklei meng 20 hrawng hlat ah a um mi khua a si. Vomthu sii-inn hi Mindat peng lawng si lo in Kanpalet peng, Matupi peng, Magwe ramthen, Pakokko peng, Gangaw peng Yaw lei tiang nih an rak fuhpanhmi sii-inn a si.
