Myanmar ram buainak ruang ah mah le ram ah um ngam loin mi ramdang ah a zaam mi ralzaam hna sin ritsii hmuh le tlaih a si cun kan dawi hna lai tiah Lawngtlai District, Central Young Lai Association President Pu Ruatpuia bia in kan theih.
Lawngtlai District chung ahhin a ummi a tam cem hi cu kanmah Chinmi thlanglei Laitlang deuh lawngte an si fawn.
A cunglei kong he pehtlai in CYLA President Pu Ruatpuia nih, “Chinmi cu kanmah he unau kan si. Unau kan si bantuk in kan har caan ah i thlah ding le hnu chit ding hi kan i tim hrimhrim lo. Asinain, kan sin ah a rak i dormi kan unau hna chung in ritsii tlaihkhih a si cun hremnak cu amah pumpak sin ah kan pek hrim lai. Amah ruang ah a dang kan unau hna pakhat hmanh an tuar lai lo,” tiah CCN ah a chim.
Lawngtlai District chung ahhin ralzaam dihlak minung 3000 leeng an um i a tam deuh cu Matupi le Paletwa Peng an si tiah kan theih.
Cun hi kong he pehtlai in Lai Autonomus (Lawngtlai District) Chief Executive Member Pu V.Zirsang ah nih, “Ritsii hi ralzaam sin tlaih a si ahcun dantat an si ko lai. Pumpak dantat an si lai. Atu ah ralzaam sin in zeihmanh kan i ruahchan lo. Thiltha lo hi cu kan tuahpiak hna hlah sehlaw kan duh bik ko. Thiltha tu cu kan chim in kan cawnpiak ve hna sehlaw kan cohlan khawh tuk. Nain, thil tha lo an tuah a si cun a tuahtu kha a tuar ve ko lai,” tiah CCN ah a chim.
Lawngtlai District chung ahhin ralzaam sin in ritsii minung pakhat an tlaih i tuanvo ngeitu hna nih thong ah an thlak tiah theih a si.
