CDF Matupi nih bomb he SAC ralhrang 16 an thah hna
Chin Ramkulh Matupi peng ah CDF Matupi nih SAC ralhrang hna cu Walanpyi khua le Kala khua kar ah bomb in an kah hna i ralhrang minung 16 nunnak liam, kut ke kiak le him lomi minung 10 hrawng an si tiah CDF Matupi sin in thawng kan theih.
Atu an kah hna hi a liamcia June 7 zaanlei suimilaam 5:00 tluk ah a si i bomb pathum lawng an hman tiah kan theih.
Min langhter duh lo pakhat nih, “Va Ngai Ceng timi ah bomb pathum in kan kah hna. Athi mi an tam, hliam a tuar mi an tam. Ralhrang hi tukar cu Matupi-Paletwa kar ah ke in an kal. Motor in an kal ngam ti lo. Lampi cung zong in an kal ngam lo. Suimilaam pakhat kal mi hi ramtang in an kal i nikhat chung hna an rau,” tiah CCN ah a chim.
2022 June 9 zong ah CDF Kanpetlet le a hawikom mipi ralkap hna nih SAC ralhrang cu Kanpetlet Peng chung ah a kah hna i minung 15 nunnak liam tiah theih a si.
